ВО НОВАТА СЕЗОНА

Власис Влаикидис ќе ја води Струмица

Во текот на оваа недела се очекува дефинитивната потврда од страна на раководството на клубот. 

објавено: 16 јули 2017 - 19:30

На клупата на прволигашот од Струмица, уште еднаш, односно повторно ќе седне еден тренер од Грција. И тоа доста добро познат на струмичката кошаркарска јавност.

Човекот кој на овој град му ја подари првата кошаркарска шампионска титула. 

Се работи за 52-годишниот Власис Влаикидис, грчки стручњак има завршено Факултет за физичка култура во Нови Сад, во класата на еден од најпознатите српски тренери Душан Ивковиќ, каде специјализирал на отсекот кошарка.

По тригодишната работа во Војводина од Нови Сад, Влаикидис, како асистент на Србинот Драган Шакота во солунски ПАОК, во 1991 година го освои Купот на победниците на куповите. Потоа пет години му бил помошник на Жељко Павличевиќ во Панатинаикос.

Новиот-стар тренер на Струмица има работено и во повеќе второлигашки клубови во Грција, но сепaк врвот на неговата кариера беше токму освојувањето на шампионската титула со КК Струмица 2005.

Во изминатиот период, Влаикидис беше и во Јапонија, каде две години работеше во клубови од првата лига,  а во последно време беше доста виден во спортските сали низ Струмица. И тоа како дел од проектот на школата „МВП“, каде се води и како еден од основачите, дел од луѓето кои го превземаа раководењето на прволигашот, и кои му ја дадоа довербата да почне со една вистинска трансформација на клубот кој во последните неколку сезони бележеше резултати под очекуваните.

Неговата промоција треба да се случи во текот на оваа седмица, но јасно е дека Струмица „врти нова страница“ во своето „секојдневие“, а првиот потег е токму именувањето на грчкиот стручњак во шеф на стручниот штаб.

Најново во Кошарка