Тотенхем на мегдан со Ливерпул во финалето на Лигата на шампионите на 1 јуни на „Ванда Метролопитано“ во Мадрид. Тоа ќе биде англиско финале во елитното клупско натпреварување во Европа и борба за „ушестиот“ пехар.

Ливерпул ќе го брка шестиот трофеј во деветтото финале, а Тотенхем првпат е во финалето.

Вторпат во историјата се случува две англиски екипи да се соочат една против друга во финалето на ЛШ. Претходно тоа се случи во сезоната 2007/08 кога на „Лужники“ во Москва играа Манчестер Јунајтед и Челзи. Тогаш „сините“ го освоија пехарот по подобро изведување на пеналите откако претходно мечот заврши 1:1.

Би било уште поинтересно и првпат во историјата ако гледаме англиско финале и во Лига Европа. Арсенал има предност од 3:1 против Валенсија, а Челси извлече 1:1 против Ајнтрахт во Германија, а во четврток игра на „Стемфорд Бриџ“. Значи големи се шансите и тоа да се случи.

Се вкупно гледано, ова е трет англиски дуел во финале на европските купови. Во 1972 година Тотенхем и Вулверхемптон Вондерерс ги одмериле силите во финалето на Купот на УЕФА. „Спарс“ победиле со 2:1.

По Арсенал, Челси, Ливерпул и Манчестер Јунајтед, Тотенхем е петтиот англиски клуб кој стигнал до финале на Лигата на шампионите. Тоа е рекорд.