Фудбалската федерација на Македонија објави соопштение во кое претседателот Муамед Сејдини изразува благодарност кон сите што беа вклучени во организација на натпреварите на македонската А репрезентација и Македонската селекција до 21 година, а со оглед на специфичната ситуација во моментов.

„Поставивме високи стандарди кои се однесуваат на епидемиолошките мерки и упатуваме благодарност, пред се, затоа што сите ги почитуваа мерките и препораките од здравствениот протокол“ – се вели во соопштението.

„Навистина е штета што публиката и навивачите на македонската репрезентација не можеа во живо да ги гледаат натпреварите против Шпанија и Ерменија, но мораме да бидеме одговорни и во целост да го спроведуваме државниот здравствен протокол, сѐ со цел најскоро што може да се вратиме на нормалниот живот“ – вели претседателот на ФФМ

„Навистина сме горди на нашите две репрезентации, на фудбалерите, стручниот штаб и сите кои се вклучени во работата на репрезентациите. Покажаа одлучност, самодоверба и почит кон дресот на македонската репрезентација. Честитки за остварените резултати и се радуваме на следните предизвици“ – истакнува Сејдини

„Фудбалската федерација на Македонија, исто така, во рамки на своите можности и се разбира доколку тоа од нас го побараат одговорните од Националната арена „Тодор Проески“ ќе се стави во функција за подобрување на квалитетот на теренот на Националната арена, иако сосема ни е јасно дека во услови на многу натпревари и тренинзи во краток временски период, луѓето кои се одговорни за одржување на теренот дадоа сѐ од себе за негово одржување“ – вели првиот човек на Фудбалската федерација на Македонија.